Fusilatuei, omenaldi xumea eta gozoa Hernanin

Aitziber Aranburuzabala 2016ko aza. 5a, 16:16

36ko gerran fusilatutako 39 arrasatear omendu dituzte gaur goizean, Hernaniko kanposantuan egin duten ekitaldian. Hainbat omenduren senideez gainera, Udal ordezkaritza ere izan da Hernanin: EAJko Maria Ubarretxena eta Ibon Arrupe, eta EH BIlduko Eneko Barberena eta Itxaro Artola.

"Ekitaldi xumea, baina, era berean, gozoa izan da. Justiziaren erreparaziorako beharrezkoa da, duda barik, horrelakoak egitea. Ezin da gertatu ziren injustiziak ahaztuta, orririk pasatu", kontatu du Maria Ubarretxena, Arrasateko alkateak.

Hernaniko kanposantuan egin dute ordu bete inguruko iraupena izan duen ekitaldia. Omendutako senidetako batek justizia egiteko eskatuta eta gertatutakoak ez ahazteko esanaz ekin diote omenaldiari. Ondoren, Maribel Vaquerok, Bizikidetzako eta Giza Eskubideetako zuzendariak hartu du hitza, eta segidan, Luis Intxauspek, Hernaniko alkateak. Ekitaldia borobiltzeko, bertsoak kantatu eta aurreskua dantzatu dute, eta ondoren, lore eskaintza egin dute.

Arrasateko Udalak biktimei laguntzeko ekimen gehiago

Gertatutakoen egia jakiteko lanean jarraitzeko asmoa duela iragarri du Arrasateko alkateak; hori horrela, biktimei laguntzeko bide berriak lantzeko asmoa duela gaineratu du. "Udaletik eskaintza bat egiten diegu senideei, Aranzadiren bitartez familiaren batek ikerketa egin gura badu, Udal ordezkariekin harremanetan jartzeko, eta Gogora Instituzioaren bitartez saiatuko ginateke horiei bidea ematen. Ikerketek bere denbora eramaten baina beharrezkoa da poliki-poliki horiei guztiei irtenbidea ematen joatea".

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak