Iñigo Arregiren 'Duintasuna' obra irabazle Gogora Institutuaren sariketan

Ezenarro eta Arregi 'Duintasuna' obrari begira.

Iñigo Arregi eskultore arrasatearrak irabazi du Jaurlaritzako Memoriaren, Bizikidetzaren eta Giza Eskubideen Gogora Institutuaren azken ideia-lehiaketa. "Bidegabeki errepresaliatutako pertsona guztien duintasunarekin berriz elkartzea sinbolizatu nahi du", adierazi du eskultore ezagunak Duintasuna obraren gainean; Elgoibarko Duintasunaren Kolunbarioan jarriko da.

Institutuko zuzendari Aintzane Ezenarrok eman dio saria Arregiri gaur, eguaztena. Esandako moduan, Elgoibarko Duintasunaren Kolunbarioan jarriko da eskultura. Kolunbarioak 36ko Gerran eta frankismo garaian desagertu ziren eta identifikatzerik izan ez diren pertsonen gorpuzkiak hartuko ditu, eta bertan kokatuko dira identifikatutako hainbat pertsonaren gorpuzkiak ere senitartekoek bertan atseden hartzea erabaki dutelako. Aukeratu den eskultura joan den udan Memoriaren, Bizikidetzaren eta Giza Eskubideen Institutuak deitu zuen ideia-lehiaketako irabazlea izan da, eta 16 lanen artetik aukeratu dute Arregirena.

Honako hau adierazi du epaimahaiak lan irabazlea aukeratzeko orduan: "Hainbat xafla bata bestearen gain ezarriz gurekin ez daudenak hutsunearen bitartez sinbolizatzen ditu, desagertutako horien arteko elkarrizketa lortzen du eta orainean obraren ondotik igarotzen garenon artekoa ere, galdutakoen memoria eta duintasuna aldi berean errekuperatuz".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.