"Kirolari guztien lana eta jokaldiak txalotu. Emaitza ez da garrantzitsuena", "Errespetatu epaileen erabakiak eta bultzatu jokalariek ere erabaki horiek onar ditzaten", eta "Gogoan izan beti erakusten duzun jarrera eredua dela zure seme-alabendako". Horiek dira, besteak beste, harrobiko taldeekin eta eskola kirolean diharduten ikusle zintzoaren dekalogoan zehazten diren puntuetako batzuk.
Seme-alabak animatzerakoan, zer nolako jarrera izaten dute gurasoek? Kirolariengan, izan etxekoak edo profesionalak, zer nolako eragina du zaleen aldetik entzuten dituztenak?
Hori guztiori aitzaki hartuta, mahai-ingurua antolatu du Arrasateko Udaleko kirol zerbitzuak.
Piropoak eta irainak
"Kirolariek oso gustura jasotzen dituzten zaleen piropoak eta berba politak. Gauzak ondo egiten direnean, ez da arazorik egoten. Baina, egoera okertzen denean datoz berba txarrak eta irainak. Horiek nola kudeatzen dituzten galdetuko diegu", esan du Jokin Etxebarriak.
Ikusleekin eta zaleekin izan dituzten esperientziak kontatuko dituzte Irizarrek, Lizarazuk, Kortazarrek eta Salsamendik.
Aitor Elduaien kazetaria izango da moderatzailea.
Arrasazoi
Badira hilabete batzuk Arrasateko Udaleko kirol zerbitzua Arrasazoi saioak egiten hasi zela. Elkarteetako kideendako, kiroldegiko erabiltzaileendako, kirol monitoreendako eta kirolariendako ekintza ezberdinak antolatu izan dira hilean behin. Bada, hurrengo asteko mahai ingurua, saio horietako bat izango da.