Arrasateko Udalak komertzio baten aurkako salaketa jarri du adingabeei alkohola saltzeagatik

3.001 euroko isuna eta hilabete bateko epean lokala ixteko zigorra jaso du saltokiak. Koma etiliko kasuen gorakada ikusita eta gurasoen kezka eta salaketen eraginez, Udal Gobernuak era honetako arau hausteak zorrotz jarraitzeko konpromisoa azaldu nahi izan du.

Arrasateko Udalak herriko komertzio baten aurkako salaketa jarri du adin txikikoei alkohola saltzeagatik. Koma etiliko kasuen gorakadak eraginda hainbat gurasok legez kanpoko salmenta horiek salatu zituzten. Arazoaren aurrean zerbait egiteko beharra ikusi zuten Udal Gobernuko kideek eta harremanetan jarri ziren herri Segurtasunerako arduradunarekin.

Lokaleko arduradunei hainbat abisu eman eta jarrera aldatzen ez zutela ikusita, kaletar jantzitako udaltzain batek aurrez aurre frogatu zuen adingabeei alkohola nola saltzen zioten. Behin hori eginda, espedientea eta kasua Gizarte Zerbitzuek kudeatu dute. Arau hauste larria izanik 3.000 eta 15.000 euro arteko isunak ezarri daitezke. Era berean saltokia ixteko zigorra jaso dezakete gehienez bi urtera arte.

"Salatua izan zen gertakizuna eta frogatuta geratu da. Arau-hauste administratiboa denez legeak ezarritakoaren arabera ezarri zaio zigorra saltokiari: 3.001 euro isuna ordaindu eta hilabete batez (iraila) saltokia itxi beharko du. Baremoak kontuan izanik, ezarri ahal izan zaion baxuena jaso du" aitortu dute gobernu taldetik.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.