Anporretako tontorreko lursaila erosteko akordioa lortu du Arrasateko Udalak

Lurren jabearekin akordio batera heldu ondoren, Anporretako tontorra jabego publikokoa izango da. Erosketari esker, inguruan dauden gerra zibileko lubakiak balioan jarri eta bertatik pasako den mendi buelta bat diseinatuko dute Besaide Mendizale Elkartekoen laguntzarekin.

Arrasateko Udalak akordioa lortu du Anporretako tontorreko lursaila erosi eta jabego publikoko bihurtzeko. 32.263 metro karratuko lursaila da eta 18.000 euroren truke itxi dute akordioa. Prezioaren barne daude lursailak gaur egun dituen pinudiak. Udalaren asmoa da hauek saldu eta egindako inbertsioaren zati bat berreskuratzea.

Jabeak lursaila herentzian jaso zuen eta ez zion inongo erabilerarik ematen. Pinudien prezio baxuak ere eragin du ugazabak interesa galtzea eta lurrak saltzearen alde egitea.

Atontze lanak

Udalaren asmoa da Kurtzetxikin egin zen antzera, ingurua garbitu eta atontzea. Anporretako tontorretik gertu gerra zibilean faxistek erabilitako lubakiak daude. Intxortakoak aski ezagunak dira, baina Arrasaten ere badaude gerra zibilaren arrasto biziak. Hauek atondu eta merezi duten garrantzia ematea da beste egitasmoetako bat.

Mendi buelta

Erosketa honen baitan, herriko mendizaleentzat mendi buelta bat sortzeko egitasmoa dago. Arrasatear askok dute mendira joateko ohitura, eta hauei ibilbide berri bat eskaintzea da erosketaren beste arrazoietako bat. Besaide Mendizale Elkartekoen laguntzarekin, Monterronetik hasi eta Anporretatik pasako den hamar kilometroko txangoa sortu nahi dute. Guztiz zehaztu gabe dagoen arren, ibilbidean zehar, Monterron, Hidalgo-baso, Anporreta, Iturritxipigaina, Meatzerreka, eta San Balerio parajeekin gozatzeko aukera izango da.

 

 

 

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.