Baleike: "Udal Gobernuak ez dauka borondate politikorik adierazpen askatasuna bermatzeko"

Baleike udal taldeko zinegotzi Igor Urizar eta Eva Abuin, osoko bilkura baten.

Baleike udal taldeak gogor kritikatu du Udal Gobernuaren jarrera garbiketa ordenantzaren harira. Atzo, astelehena, egin zen Obrak, Zerbitzuak, Mantenua eta Auzoak batzordeko azken batzarra: "Argi geratu da gobernuak ez duela borondate politikorik Arrasaten benetako parte-hartze bat sustatzeko edota adierazpen askatasuna babesteko". 

Podemosen Arrasateko zirkuluak ohar bidez jakitera eman duenez, 78 alegazio aurkeztu ziren: "Hurrengo urratsa izango da mozal ordenantza uztailaren 12ko osoko bilkuran onartzea EAJren eta PSE-EEren aldeko botoekin". Baleikeren ustez, adierazpen askatasuna ez bermatzearen adibide bat da Monterron parkeko hesietan pankartak jartzeko debekua: "Hainbat eragilek salaketarako erabilitako leku mitiko bat da".

"Gobernuaren argumentuek ez dute zentzurik"

Horrekin batera, gobernuak parte-hartzearen inguruan duen kontzeptua ere kritikatu dute: "Gobernuak dio parte-hartzea sustatu nahi duela, parte-hartze hori bera despolitizatzeko alderdi politiko guztien artean metodologia eredu bat sortu izanaren aitzindari direla esanez. Baina, aldi berean, ordenantza hau debatera ekartzeko espazio zabala ukatzen dute; diote herritarren parte-hartzerako parametroak adostu egin behar direla. Argumentu horrek ez du zentzurik kontuan hartzen badugu modu paralelo baten prozesu parte-hartzaile batzuk abiatu dituztela; Gorostizako jolas parkea estaltzeko prozesua da horren adibide.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.