Urtero legez, uda gerturatzeaz bat Haur Dantzarien Eguna ospatuko dute Arrasaten. Aurtengo edizioan 500 haur inguru arituko dira dantzan. Bailaratik Aramaio, Aretxabaleta, Oñati, Antzuola, Bergara eta Arrasateko dantzariek hartuko dute parte. Gipuzkoatik; Soraluze eta Oiartzunekoak. Bizkaitik, aldiz, Portugalete eta Markinakoek eta Nafarroatik Leitzakoek.
Eguraldiak kale egiten ez badu, 10:00etan elkartuko dira Zaldibarren, herriko plazara kalejira egiteko. behin bertan hamaiketakoa izango dute zai, eta indarrak hartu ostean dantzatzeari ekingo diote. Arbolapetan, Biteri plazan eta Seber Altuben plazan dantzatuko dute, ondoren herriko plazan bukatzeko.
Kanpotik etorritakoek herriko dantzarien etxeetan bazkalduko dute , eta eguna amaitzeko, 17:00etan azken dantzaldia egingo dute herriko plazan. Eguraldi txarrarekin Uarkapen egingo dituzte dantzaldiak, baina antolatzaileek eguraldi ona egiteko esperantzari eutsi nahi diote.