Baskonia final barik geratu arren, zaletuen animoekin bete zen Iturripe

Iturripeko harmailetan, zaletuak Fenerbache-Baskonia partidua ikusten.

Ointxe! saskibaloi elkarteak pantaila erraldoia jarri zuen atzo Iturripen Laboral Kutxa Baskonia eta Fenerbahcek (88-77) Berlinen jokatu zuten finalerdia ikusteko. Zaletu asko izan ziren gasteiztarrak animatzen, baina sufritzea tokatu zitzaien. Beraz, Baskonia finalera ez denez heldu, ez da pantaila erraldoirik izango bihar Iturripen.

Finala gertu izan arren, ihes egin zion partiduak Baskoniari azken laurdenaren azken minutuan. Hala, Baskonia Euroligako finala jokatu barik geratu da. Iturripen batu zirenak penaz joan ziren etxera, eta ezin izango dute Baskonia domekako finalean ikusi.

Harmaila nagusia beteta, taberna bat ere jarri zuten Ointxeko infantil mailako neskei laguntzeko, izan ere, Galiziara joango dira Espainiako txapelketara, eta haiei laguntzeko asmoz diru dezente batu zuten.

Partiduaren laburpena

Hasiera traketsa izan zuten Perasovic-en mutilek, eta defentsan lan ona egin ondoren, zortzi puntuko aldearekin bukatu zuten Turkiarrek lehen laurdena (23-15). Taldeak gogor borrokatu zuen, bigarren laurdenean, eta puntu bakarreko aldearekin heldu ziren atsedenaldira (41-40).

Hirugarren laurdenean, aurretik jarri ziren baskonistak (50-54), eta azken laurdenean, berriz, zazpi puntuko aldea ere atera zuten gasteiztarrek (59-66). Amaieran, Adamsek jaurtiketa librea huts egin ostean, Sloukas-ek partidua berdindu zuen (72-72).

Intentsitatez betetako partiduan Bourousis izan zen protagonista, eta zaletuek asko animatu zuten, hala eta guztiz epaileek ere zer esan handia izan zuten partidua erabakitzerako orduan.

Bost minututako luzapenean aldea atera zuen Fenerbahcek, eta Baskoniak ezin izan zion aurre egin. Hala, finaletik kanpo geratu dira gasteiztarrak, nahiz-eta lan bikaina egin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.