Musakolako jaien barruan antolatutako mendi bizikleta martxak arrakasta izan zuen domekan, 215 lagunek hartu zuten-eta parte bertan. Bizikletan ibiltzeko giro onaz, eta basoak lokatz barik, ziklistek izugarri gozatu ahal izan zuten goizarekin. Eguneko albiste txarra eroriko baten ondorioz etorri zen, ziklistetako batek min hartu zuelako, aurpegian kolpe handia hartuta.
Erorikoaren ondorioz ziklistak konortea galdu zuen, baina ospitalera eraman zutenetako bere onera etorrita zegoen. Hala, atzo, astelehena, egin zioten ebakuntza, eta onik dago.
154 gaztetxo, Elorregira bidean.
Nagusien martxaren arrakastaren ondotik etorri zen gaztetxoen martxako arrakasta ere. Adin ezberdinetako gaztetxoekin Musakolako Jai Batzordeko kideek Elorregira (San Prudentzio) egin zuten joan-etorria. Gaztetxoenak bidegorritik joan ziren, eta apur bat helduagoek Etxezarretatik egin zuten itzulia. Hala, bi martxak batuta ia 400 lagun ibili ziren domekan bizikletan.
