Muzibartik San Frantziskorako eremua berrantolatzea aurreikusten du Udalak, bi fasetan

Osoko bilkuren aretoa bete egin zen atzoko bileran.

Arbolapeta eta Muzibar arteko kaleen berrantolaketa dela-eta, Arrasateko Udaleko ordezkariek bilera egin zuen astelehenean Zarugaldeko bizilagunekin: "Asko eta askotarikoak izan dira proposamenak. Baina ekarpen guztiak aztertu ostean, ikusi da eraberritu behar den eremuak handiagoa izan beharko lukeela. Beraz, Muzibartik San Frantziskoko biribilgunera doan eremurako aukera ezberdinak aztertuko dira", jakinarazi dute prentsa ohar bidez. Bileran egon ziren bizilagunek zirkulazioa Zarugaldetik bideratzearen aurka agertu ziren.

Udalaren arabera, proiektuaren "egungo egoera zehatza" zein den eta helburuak zeintzuk diren azaltzeaz gain, bileraren egitekoa izan zen prozesuaren baitan datozen urratsak zeintzuk izango diren aurkeztea: "Bizilagunen iritzi eta ekarpenak ere entzun eta jaso ziren, proiektuak eragingo dituen aldaketen inguruan arduratuta daude-eta", gaineratu dute.

Eremu zabalagoa

Udal ordezkariek nabarmendu dute, "asko eta askotarikoak" izan direla jasotako proposamenak: "Ekarpen guztiak aztertu ostean, bistako ikusi da, berrantolatze prozesuaren emaitzak eraginkorrak izan daitezen, eraberritu behar den eremuak handiagoa izan beharko lukeela". Hortaz, Udalaren arabera, Muzibartik San Frantziskoko biribilgunera doan eremua berrantolatzeko aukera ezberdinak aztertuko dira.

Bi fasetan egin beharrekoa

Dena den, eremu bakoitza fase ezberdin baten gauzatuko da, Muzibar­ eta Arbolapeta artekoa izango da lehena eta Arbolapeta eta San Frantzisko artekoa bigarrena. Proiektuaren bigarren fase horretarako ere erakusketa jartzea aurreikusten dute: "Atzoko bileran argi geratu zen bere garaian Muzibar­ eta Arbolapeta kaleen berrantolaketarako aurkeztutako 21 proposamenak gehiegi izan zirela; bizilagunek aukera gutxiago eta zehatzagoak eskatu dituzte", gaineratu du Udalak prentsa ohar bidez.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.