Presoen aldeko hileko azken barikurako deia herriko hainbat gaztek egin dute

Euskal Preso eta iheslarien eskubideen errespetua aldarrikatzen duen Sare erakundeak dei berezia egin du hilaren 29rako, hau da, apirileko azken barikurako. Hartu Trena dinamikaren baitan, hainbat gazte arrasatear batuko dira egun horretako elkarretaratzera. "Arrasaten bagoiak osatuz gabiltza; lehenengo, mendizaleen bagoia osatu genuen eta, orain, gazteen bagoia osatu dugu" diote Saretik. Hala, hileroko azken barikuko elkarretaratzea, apirilean, gazte horiek deituko dute. 19:30ean Herriko plazan izango da. Gazteek argazki eta bideo berezia osatu dute elkarretaratzera dei eginez. Arrasateko Sarek ere ekimena babestu eta "herritar guztiok bertara hurbil gaitezen" dei egin du.