Garagartzako produkzioa bikoiztu du Fagor CNAk

Fagor CNAren logoa.

Fagor CNA Groupek 2014 bukaeran ekin zion Garagartzan labeak eta plakak ekoizteari. Orain, CNA taldearen markekin zein bezeroen markekin egindako labe-gama guztien ekoizpena bikoiztea lortu duela jakinarazi du enpresak.

2014ean iragarri modura, labeen produkzioa pixkanaka handitu da azken bi urteetan zehar. Izan ere, “Fagorrentzat garrantzitsueneratikoa den produktu horren eskaera handitu egin da,  enpresak ekoizle gisa nazioartean duen entzuteagatik eta mundu mailan labeetan aditua izateagatik”, taldeak esan duenez. Horiek horrela, Fagor CNA Group taldeak, iazko datuekin alderatuta, labeen produkzioa bikoiztea lortu du Garagartzan.

Labeak berritu dituzte

Gainera, aurten, Fagor CNAk hobekuntzak eta berrikuntzak egin ditu labe gama berrietan eta horiek 2016an zehar aurkeztuko dira. Berrikuntza nagusiak zenbait hobekuntzatan oinarritu dira, hala nola produktuen eraginkortasunean, aurrezpen energetikoan, erabilerraztasunean eta produktuen garbiketan. Hala, erabiltzaileentzat kontrol-panel praktikoagoak eta intuitiboagoak diseinatu ditu, sukaldatzea sinpleagoa, errazagoa eta seguruagoa izan dadin.

Era berean, 2017ko lehen hiruhilekoan aurkeztuko diren berrikuntzetan ere lanean dihardute. Berrikuntza horiek Fagorren izenpean kaleratuko dira eta etxean, produktuen erabilerraztasuna, eraginkortasuna eta sukaldaritza profesionala lehenetsiko dituzte.

Fagor CNAk adierazi du enpresako Industria Planean jasotakoa betetzen ari direla; salmentak oso emaitza onak ditu, bereziki egosketa produktuen alorrean, non Fagor beti izan den merkatu-buru. Gaur egun, Fagorrek merkatu-kuota garrantzitsua du alor honetan eta urte amaierarako, Plan Estrategikoan jasoa dagoenaren arabera, enpresak merkatuan duen presentzia areagotzea espero da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.