Apirilaren 22an hasiko da aurtengo Udaberriko Musikaldia, Opus 4 eta Txorbela otxotearen eskutik. Maiatzaren 1era bitartean hainbat kontzertu eta musika ikuskizun izango dira Arrasateko agendan.
Nabarmentzekoa da, esaterako, apirilaren 24ko Stradivarias emanaldia. Antzerkia, umorea eta orotariko estiloetako musika uztartzen ditu, klasikotik hasi eta rockeraino.
Apirilaren 16an, berriz, askok luzaroan esperotako Ken Zazpi taldearen kontzertua izango da Amaia antzokian, 20:00etan hasita. Duela bi hilabete honezkero agortuta zeuden emanaldirako sarrerak.
Hitzaldiak
Apirilean, Nafarroako Erresuma mintzagai izango duen hitzaldi ziklotxoa izango da Kulturateko areto nagusian. Hala, hilaren 13an, Amalurreko Gaztelua berbaldia eskainiko du Juantxo Agirrek; 20an, Nafar Erresumako txanponen historia, Mikel Legorbururen eskutik; bukatzeko, hilaren 27an, Floren Aoizek Nafarroa, aldaketaren gakoak hitzaldia eskainiko du.
Liburuaren eguna
Apirilaren 23an liburuaren eguna ospatuko da, eta horren harira, hainbat hitzordu izango dira. Rockomikiaken baitan, bisita gidatuak edota Bertso punk margotua izango da.
Bestalde, liburu aurkezpenak, munduko kontu kontalariak eta umeentzako Zaku bete lelokeri ikuskizuna ere antolatu dute.