Arrasateko udaletxean Errepublikaren bandera jartzearen aurka bozkatu du EAJk

Apirilaren 14an Espainiako II. Errepublikaren bandera jarriko dute Arrasateko udaletxeko balkoian, hala onartu zuelako udalbatzak atzo egindako osoko bilkuran, EH Bildu, Ahal Dugu eta Irabaziren botoekin. EAJk, proposamen horren aurka bozkatu zuen, eta zera argitu gura izan du: "Errepublikaren bandera espainola da, eta guk badaukagu gurea, ikurrina".

Espainiako II. Errepublikaren bandera jartzea proposatzen zuen mozioa Irabazik aurkeztu zuen atzo, martitzena, egindako ezohiko osoko bilkuran. Eta EH Bildukoek, Podemos-Ahal Duguko eta Irabaziko zinegotziek alde bozkatu zuten; PSE-EE abstenitu egin zen.

EAJ izan zen aurka bozkatu zuen bakarra, hortaz, eta horren zergatia azaldu gura izan dute: "Guk aldarrikatzen duguna da Euskal Herriko errekonozimendu eta erabakitze eskubidea, bere etorkizuna askatasunez eta era demokratikoan erabakitzeko eskubidea. Hortaz, bandera errepublikarra espainola da, eta guk badaukagu gurea, ikurrina, alegia. Eta bigarren, mozio honetan Errepublika, nazio euskalduna bere etorkizuna erabakitzeko gai den subjektu politiko bezala errekonozitzen ez zuen konstituzio espainol batean oinarritzen da. Hori kontutan izanik gure botoa aurkakoa izango da".

Irabazik aurkeztutako mozioan, 1936ko uztailaren 18ko altxamendu militarra salatzea, II. Errepublikako bandera udaletxean jartzea eta II. Errepublika aldarrikatu zela 85 urte betetzen direnean, hainbat ekitaldi antolatzea hura gogoratzeko eskatzen zen.

Mozioa, esan bezala, aurrera atera zen, Udal Gobernuko bi alderdiek alde bozkatu ez bazuten ere.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.