Anoetan jokatutako Euskadiko Txapelketan bost domina irabazi dituzte Arrasateko atletek

Eneko Carrascal podiumean, zilarrezko dominarekin. Argazkia: Fernando Zufiria.

Pista estaliko Euskadiko Txapelketa jokatu dute aste bukaeran Anoetan. Arrasateko Kanpanzar elkarteko atletek lan txukuna egin dute. Bost domina irabazi dituzte: urrezko bat, bi zilarrezko eta brontzezko bi. Iñigo Uribarrenek lortu du urrezko domina jauzi hirukoitzean. Hurrengo aste bukaeran Espainiako Txapelketa jokatu dute Salamanca eta Madrilen.

Zapatuan, luzera-jauzian, Eneko Carrascalek 7,03 metroko jauzia egin zuen eta marka horrekin zilarrezko domina irabazi zuen. Gazte mailan jokatzen du Carrascalek –16 urte ditu–. Orain arteko bere marka onena 6,99 metrokoa zen.

Pertika-jauzia

Pertika-jauzian, Malen Ruiz de Azuak promesa mailan zilarrezko domina lortu zuen 4,10 metroko jauzia eginda; eta, Maialen Axpek nagusien mailan brontzea lortu zuen 3,90 metroko jauziarekin.

Urrea, jauzi hirukoitzean 

Domekan, jauzi hirukoitzean, Iñigo Uribarrenek urrea irabazi zuen, nagusien mailan, 15,54 metroko jauzia eginda.

Pertika-jauzian, Jonathan Perezek brontzea irabazi zuen 4,80 metroko jauzia eginda.

Espainiako Txapelketa izango dute aste bukaeran

Arrasateko atletak datorren aste bukaeran jokatuko duten Espainiako Txapelketara begira daude. Gazte mailakoek Salamancan izango dute txapelketa; eta, gainerakoek Madrilen.

Arrasate Kanpanzar elkarteko hiru atleta joango dira Salamancara: Ibai Fernandezek 60 metroko lasterketa egingo du, 7,15 segundoko markarekin; Daniel Martinezek 400 metroko lasterketa egingo du, 51,81 segundoko markarekin; eta Eneko Carrascalek luzera-jauzian parte hartuko du 7,03 metroko markarekin, eta jauzi hirukoitzean 14,98 metroko markarekin. Carrascalen markak gazte mailako Espainiako onenak dira. 

Madrilera joango dira

Madrilera joango dira: pertika-jauzian Malen Ruiz de Azua, Mailen Axpe eta Istar Dapena  –Jonathan Perez kanpoan geratu da– eta jauzi hirukoitzean Iñigo Uribarren. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.