Erroldak onartuta, indarrean sartuko dira Arrasateko udal zergak eta tasak

Arrasateko Udalak jakinarazi duenez, aldian behin kobratzen diren tasak eta zergak ordaintzeko beharrezkoak diren errolden onarpenak gauzatuta, horiek kobratzeari ekingo diote. Datozen hilabeteetan, Ondasun Higiezinen gaineko Zerga, Jarduera Ekonomikoen Zerga, Ibilgailuen gaineko Zerga, zabor tasa eta ur tasa ordaindu beharko dituzte arrasatearrek. 

Ordainagiriak helbideratuak dituztenei zuzenean kobratuko zaie eta besteek, euren etxeetan jasoko dute erreziboa ordainketak egin ditzaten.

Ur Tasa: Kobratuko den lehena ur-tasa izango da. Ordainagiria helbideratuta dutenei martxoaren 5ean kobratuko zaie eta ordainagiria helbideratuta ez dutenek apirilaren 7 arte izango dute tasa hau ordaintzeko aukera.

Zabor Tasa: Ondoren, zabor tasa kobratuko da, martxoaren 19an ordainagiria helbideratua dutenei eta ez dutenek martxoaren 19 bitarte ordaindu beharko dute aipatutako tasa.

Ibilgailuen Gaineko Zerga: Ibilgailuen gaineko zergari dagokionez, hau apirilaren batean kobratuko da eta ordainagiri helbideraturik ez dutenek ere apirilaren 1 dute ordainketa egiteko azken eguna. 

Borondatezko azken egunetik gerora kobratzen diren ordainagiriak premiamenduzko prozeduraz gauzatuko ditu udalak. Horrelakorik gerta ez dadin, herritarrei beren laguntza eta elkarlana eskatu diete udaletik, borondatez ordainketak egin ditzaten.

Udaletik azaldu dute, herritarrek ordainketak BAZen banku txartelarekin, banketxeetan ordainagiria aurkeztuta edota Eusko Jaurlaritzako webguneko Pasarela de pagos atalean egin ditzaketela, non sarbidea Udalaren webgunean dagoen. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.