Joan den domekan Gasteizen Gaztedi B-ren aurka irabazi ostean, lider postuan mantendu da Kanpanzar Arrasate Rugby Taldea, orain arteko norgehiagoka guztiak irabazita. Asteburu honetan Arratiko Zekorraken kontra zerrenda hori beste garaipen batekin betetzen saiatuko dira sarrailagileak etxean.
Zuri-moreentzako baldintzak onenak izan ez ziren arren, azkenik 12-25eko emaitzarekin irabazi zuten Gasteizen. Jokalari gutxi zeuzkaten partidurako, hamasei hain zuzen; gainera, gripeaz zegoen Jon Ander Delgadok berdegunea laga behar izan zuen hasi eta gutxira, eta ordezkorik gabe geratu zen Arrasateko taldea.
Hamaikagarrenaren bila
Domekan sarrailagileek Arratiko Zekorrak hartuko dituzte etxean. Klasifikazio taulan seigarren doaz bizkaitarrak, azkenaurreko postuan. Joaneko partiduan arrasatearrek 17-29 irabazi zieten arratiarrei. Hala ere, azken hauek jokatu dituzten azken hiru partiduak irabazi egin dituzte.
