Bilboko taldeak badaki zer den Kooltur Ostegunak ekimenaren barruan jotzea: "Elurte baten etorri ziren eta zalantzak izan genituen etorriko ziren edo ez. Prestutasun handia erakutsi zuten etortzeko eta gainera disko berria aurkezten ari dira. Ea oraingoan baldintza normaletan jo dezaketen", diote antolatzaileek.
Energia eta gaztetasuna
Rocka, hardcore melodikoa, popa, metal tantak, energia eta gaztetasuna transmititzen ondo dakite. Eta aurkeztu berri duten E izeneko hirugarren lan luzean, aipatutakoez gain, dance ukituak ere gehitu dituzte.
'ETour'
ETour izeneko biraren barruan emango du kontzertua 2009an Bilboko Errekalde auzoan sortutako taldeak. Izan ere, E da disko berriaren izenburua; lan berrian rock gordinaren sustraiak eta doinu dantzagarriak nahastu dituzte. Urtarrileko egitaraua Bilboko Sonic Trash taldeak itxiko du hilaren 28an; rock basatia eskainiko dute.