'Rigoletto' opera antzeztuko dute otsailaren 24an Amaia antzokian

(Argazkia: Opera 2001)

Domeka honetan, urtarrilaren 10ean, jarriko dituzte salgai otsailaren 24an, eguaztena, Arrasateko Amaia Antzokian ikusgai izango den Rigoletto opera famaturako sarrerak.

Opera 2001 konpainiak taularatuko du Giuseppe Verdi konpositore italiarraren obra, eta nazioarteko hainbat artistak hartuko du parte. 20:00etan izango da Arrasateko emanaldia, eta Ozenki elkartearen eskutik dator.

Ekoizpen hori aurki estreinatuko dute Valentzian Opera 2001ekoek, eta horrela, otsaila eta martxoa bitartean Espainiako eta Frantziako estatuetako hiriburu eta hiri garrantzitsu askotatik pasako den bira bat hasiko dute; bira horren baitan, Arrasatetik ere pasatuko dira.

Protagonistak

Plevengo (Bulgaria) orkestra sinfonikoa izango da operari musika jartzeaz arduratuko dena, Martin Maziken zuzendaritzapean. Verdiren istorioko protagonista nagusiak interpretatuko dituzten aktore-abeslariak, berriz, honako hauek izango dira: Rigolettoren papera Giulio Boschetti baritonoak beteko du; Gildarena Sonia Bellusik (sopranoa); Mantuako Dukearena David Bañosek (tenorea), Monteronerena Tihomir Androlovek (baritonoa) eta Maddalenarena Liliana Matteik (mezzo-sopranoa).

Sarrerak non eskuratu

Rigoletto opera Arrasaten ikusteko sarreren prezioa 30 euro da, eta Amaia Udal Antzokiko leihatilan, Kutxabanken, Arrasateko Udalaren  webgunean edota Ozenki elkartearen posta elektronikora idatzita eros daitezke: ozenkielkartea@hotmail.es. Aipatu bezala, etzitik aurrera izango da sarrerak eskuratzeko aukera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.