Etorkizunerako erabakiak lantzeko bilerak deitu ditu Arrasateko Gure Esku Dagok

Arrasateko Lantaldeko Balen Tramon eta Oxel Urrutia.

Arrasateko Gure Esku Dagok etorkizunean hartu beharreko erabakiak lantzeko lehen eztabaida-txosten bat eratzea nahi du, lau zutabetan oinarrituta: egitekoa, jarduera, antolamendua eta finantzamendua. Eztabaida-txosten horren gainean herri-hausnarketa proposatu gura dute eta horretarako bi bilera ireki deitu dituzte: lehena urriaren 24an egingo da gaztetxean 17:30etik 19:00etara. Bigarren bilera urriaren 26an egingo da Kulturaten, 18:30etik 20:00etara. 

Gure Esku Dagok egituratzearen beharra ikusi du, espontaneoki sortutako mugimendua gorpuzteko asmoz. Azken hilabeteetan egindako hausnarketaren ondorioz, Eskura txostena sortu dute; dokumentu honek Gure Esku Dago dinamikaren zoru komuna jorratzen du, hau da, edozein euskal herritar demokratak onar lezakeen planteamendua, edozein dela bere pentsamoldea. Horregatik, hitzak eta esaldiak apropos dira leunak, ahal den neurrian ertzik gabeak. 

Urriaren 24rako eta 26rako deitu dituzten bileretako gogoeta sei edo zazpi laguneko talde txikitan egingo da, dinamizatzaile batek bideratuta. Ekarpenak jaso ostean, Gure Esku Dagok hurrengo urteetarako oinarri gisa erabiliko duen dokumentua prestatu eta batzar orokorrean bozkatuko da. Internetez parte hartzeko www.eskura.eus webgunea sortu dute. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.