Asteburuko pintaketak garbitzeko, 10.000 eurotik gorako gastua egin dela jakinarazi dute udaletik

Arrasateko Udalak 10.190 euroko garbiketa gastua egin du azken asteburuan herriko hormetan agertutako pintaketak eta zikinkeria direla-eta. "Gastu izugarri" honen berri eman gura izan dute udaletik eta Maria Ubarretxena alkateak azpimarratu du "arrasatear guztientzako kostua" dela hori. 300 pintaketa eta 660 metro horma garbitu behar izan ditu CESPA enpresak. 

"Guztionak diren espazio publikoak errespetatzeko" eskaria egin du alkateak eta "guztion ondare" dena zaintzeko deia egin. Garbiketa lanek 10.190 euroko kostua izan dute oraingoan eta ohar bidez jakinarazi dutenez, "izugarrizko kaltea" eragin da, bai pintaketek eurek zein horiek ezabatzeko erabiltzen diren produktu kimikoek duten eraginarengatik, harrizko hormak garbitzeko zailak baitira. Udalarentzat, "amaiera eman" behar zaio "pintaketen ondorioz islatzen den utzikeri eta zikintasun irudiari". Ubarretxenak dio helburua dela "bisitariei eta bereziki herritarrei herri atseginagoa eta garbiagoa eskaintzea" eta kontzientziazio ahalegina egiteaz gain, iragarri du adierazpen taulak ipiniko dituztela herritarrek bertan jar ditzaten kartelak. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.