Bestalde, EBA urriaren 17an hasiko du MUk La Flecha taldearen aurka. Iaz baino jokalari gutxiago izango dituzte; bajen artean daude saskibaloia utzi duen Gorka Kintana, lanaren ondorioz taldean jarraitu ezin duen Unai Barrena, eta lanagatik ere jokatzeko arazo handiak izango dituzten Alex Lorenzo eta Mikel Atxa. Bestalde, Beñat Barberena jokatzeko moduan egongo da aurten; hori bai, hernia-diskalak eraginda urte osoa geldi egon ostean, "pazientzia handia" izango dute jokalari arrasatearraren itzulera bermatzeko. Barberenarekin batera, Bergarako Jon Ugarteburu jokalari gaztea ere egongo da entrenatzaile eskoriatzarraren agindutara.
Urte zaila aurretik
Urte zaila espero du Larreategik: "Bigarren urteak lehenak baino zailagoak izan ohi dira. Lehen urtean ilusioa handia dago, beste taldeek ez zaituzte ezagutzen... Jokalari gutxiago izango ditugu, gainera. Maila mantentzeko asko borrokatu beharko dugu".