Mondrate, "ilusioz gainezka" denboraldi berrirako

Mondrateko jokalariak, irailaren 5eko lagunartekoaren aurretik.

Iaz mailaz igotzea lortu ostean, Gipuzkoako Lehen Mailan lehiatuko da Mondrate areto futbol taldea urriko lehen aste bukaeran hasiko den ligan. Abuztuaren 24an ekin zioten aurre-denboraldiari eta orain arte jokatu duten lagunartekoak ezin izan dira hobeto joan. Izan ere, iraileko lehen aste bukaeran Euskadiko Ligan dauden Aretxabaletako eta Eskoriatzako taldeen aurka jokatutako hiruko txapelketa irabazi zuten eta joan den aste bukaeran maila berean dagoen Elorrio hartu zuten mendean Jon Zabala Txanpi-ren mutilek.

Hala ere, hankak lurrean izatea komeni dela dio entrenatzaileak: "Iaz moduan, lehen helburua maila mantentzea izango da eta behin hori lortuta ikusiko da; hori bai, ilusioz gainezka gaude. Talde ona dugu, baina partiduz partidu joan behar gara". 

Bizkarrezurra, iazko berbera 

Aurre-denboraldian egonik, astean hiru entrenamendu saio egiten dituzte orain eta behin liga hasita astean birritan entrenatzea da euren asmoa. Aurten 15 jokalari izango ditu bere agindutara Zabalak. Kopuru "polita" dela dio, eta horrek talde barruko lehiakortasuna areagotzea ekarriko duela: "Ez da erraza izango lagunak diren bi edo hiru jokalari deialditik kanpo utzi behar izatea, baina barruko lehia hori ona izango da gure maila hobetzeko".

Taldeko bizkarrezurra mantentzeaz gain, Ibai Hernandez bergararraren eta Igor Oianguren aramaioarraren fitxaketekin taldea "ondo" sendotu dute. Amaitzeko, Zabalak dei egin die zaleei Musakolako zein Iturripeko harmailak bete ditzaten: "Oso garrantzitsuak dira guretako", dio. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.