Harearekin magia egiten duen artista bihar Arrasateko Herriko Plazan

Borja Gonzalez harearekin lanean.

Udazabal ekimenaren barruan, Ytuquepintas konpainiako kide Borja Gonzalez artistaren eskutik –Borja Ytuquepintas da haren izen artistikoa– Sueños de arena ikuskizunaz gozatzeko aukera egongo da bihar, zapatua, Herriko plazan (22:30). Euria egiten badu Amaia antzokian izango da, doan. Diziplina anitzeko ikuskizuna da, arearekin irudi magikoak, akrobaziak, txotxongiloak eta zuzeneko musika batzen dituena, besteak beste. 

Ikuslea amestera gonbidatzen duen ikuskizuna da. Eskuekin bakarrik eta kristalezko mahai baten gainean, artista ilustratzaileak mundu bat sortuko du ikuslearen aurrean, askotariko emozioak biltzen dituen istorioak kontatuz. Hala, ikusleak ilustrazio bakoitzaren sorrera  zuzenean ikusteko aukera izango du, betiere Roc Sala teklatu-jotzaile eta konposatzailearen zuzeneko musikarekin lagunduta.

Artearen iragankortasunaz

Honako hitz hauekin deskribatzen du Borja Gonzalezek bere lan esparrua: "Ohituta gaude artea denboran irauten duen zerbait bezala ikustera, artista hilda badago ere bizirik dagoen obra baten antzera. Baina artea iragankorra ere bada, artea izan daiteke une jakin batez irauteko beharrik izan gabe".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.