Liga txapelketa bukatu ostean, berriro ere protagonista izango da errugbia: 15:00etan hasita partiduak jokatuko dituzte Mojategin. Erredakzioa ixteko orduan bost taldek zuten izena emanda: Ordiziak, Eibarrek, Gaztedik, Elorriok eta ARTk.
Lehen fasean zazpi minutuko bi zati jokatuko dituzte. Multzo bakoitzeko bi talde onenak bigarren faserako sailkatuko dira. Finalerdietan eta finalean hamar minutuko bi zati jokatuko dituzte taldeek.
Sari banaketa ekitaldia 21:00etan egingo dute, Herriko Plazan dagoen garagardo azokako karpan. Eta, horren ostean, han afalduko dute zazpiko txapelketan parte hartu duten jokalari guztiek.
Garagardo azokako datuak
Garagardo azoka atzo, eguena, zabaldu zuten eta domekara arte egongo da karpa Herriko Plazan. ARTko kideek 2.190 litro garagardo, 375 oilasko, 720 txerri-ukondo eta 130 pote saltxitxa eskatu dituzte.
Lehenengo Mailari, bai
Denboraldi bikaina jokatu eta igoera lortu ostean, Lehen Mailan jokatzeko erabakia hartu dute arrasatearrek. Zazpiko txapelketa bukatu ostean, bi asteko oporraldia hartuko dute denboraldi-aurrea prestatzen hasi aurretik. "Arlo fisikoa asko landu beharko dugu, eta baita abiadura ere. Bi arlo horiek dira lehenengo eta bigarren mailen arteko ezberdintasun handienak", dio Igor Isasi entrenatzaileak.
