Arrasateko andaluziarrek osatzen duten Al-Andalus elkartearen 25. urteurrena aprobetxatuta, Capachos taldearen azken lana ikusi ahal izan zen zapatuan Amaia antzokian. Arrasateren eta Kordobako Montilla herriaren arteko lotura du oinarri emanaldi horrek eta bertaratu ziren 200 lagundik gorak disfrutatu ahal izan zuten ikuskizunarekin.
Emanaldia hasi aurretik, Capachos taldeko piano-jotzaileak girotu zuen antzokia piano doinuekin, eta narratzailearen azalpen batzuen ostean, kontatutako eta kantatutako maitasun istorio baten lekuko izan ziren bertaratutakoak. Txalo zaparradak entzun ahal izan ziren abestien ostean.
Ikuskizunaren amaieran, antzokiko ikus-entzuleak zutik jarri ziren txaloka eta koru batzuk egitera ere ausartu ziren. Capachos taldekoek, ostera, esker hitzak izan zituzten bukaeran Arrasateko Udalarendakok eta baita Al-Andalus elkartearendako ere.
Al-Andalusen 25. urteurrena
Andaluziarrek osatzen duten elkartearen urteurrenaren harira egindako ikuskizuna izan zen eta Rafa Gomez elkarteko presidentea oso gustura zegoen ikuskizunaren ostean. Ikus-entzuleak "oso gustura" gelditu zirela azaldu du eta gaur, domeka, Zigarrola auzoko elkartean bazkaldu dute batera Capachos taldeko kideek eta Al-Andalus elkartekoek. Izan ere, Capachos taldekoak asteburua Arrasaten igaro dute, elkartekoekin batera.