Zapatuan erabakiko da zeintzuk izango diren ekainaren 6ko finalerako sailkatuko diren bi taldeak; honako hauek dira hautagaiak: Dribling, Betrayer, Aldatz eta Lasagabaster. Iazko txapelduna da aurtengo faborito ukaezina: "Dribling beste maila baten ibili da liga osoan zehar. Gol gehien egin eta gutxien jaso dituen taldea da, eta ez dut uste partidurik galdu dutenik", dio antolakuntzako kide Mikel Viguerak. Dribling-en aurka jokatuko du Betrayer talde mitikoak, final laurdenetan ezustekoa eman eta Sonografos kanporatu ostean (4-5): "Betrayer-ek denboraldi gorabeheratsua egin du, baina azken partiduetan ondo ibili dira. Hala ere, sorpresa handia izan zen Sonografos menderatzea".
Harmailak betetzeko deia
Hirugarren hautagaia Aldatz da; eskoriatzarrek Jibaros FC taldea menderatu zuten final laurdenetan (5-3): "Talde potentea dute eta elkarren artean oso ondo ezagutzen dira", dio Viguerak. Aldatz taldearen aurrean egongo dira Zaldibarren oso ezaguna den Lasagabaster taldea: "Ligan gorabeherak izan dituzte, baina beti daude hor. Partidu horretan ez dut faboritorik ikusten". Lasagabasterrek in extremis lortu zuen finalerdietarako txartela, azken bost minutuetan hiru gol egin eta Abokajarrori irabazita (5-7).
Antolakuntzakoak izango dira epaileak biharko bi norgehiagoketan. Azkenik, honako mezua helarazi gura izan dute: "Herritarrak gonbidatu gura ditugu Zaldibarko frontoira gertura daitezen, partidu onak izango direla espero dugu".