Pilotari arrasatearrak, Herri Arteko Txapelketako faboritoetako bat menderatzera

Arrasateko pilotarien taldea.

Herri Arteko Pilota Txapelketako lehen kanporaketan Andoaingo taldea mendean hartu ostean, Arrasateko pilotariek Astigarragako taldearen kontra jokatuko dute. Bigarren kanporaketako joaneko partiduak egubakoitzean, hila 22, jokatuko dira, Uarkape pilotalekuan (20:00). Txapelketako faboritoetako bat izango dute aurrez aurre pilotari arrasatearrek. 

Kanporaketa zaila izango da: "Bikote orekatuak dituzte, maila guztietan dituzte pilotari onak. Hala ere, guk baditugu gure armak, batez ere kadete eta gazte mailako pilotariak oso ondo dabiltza. Gure asmoa da Uarkapen ahalik eta emaitzarik onenak ateratzea, izan ere, Astigarragakoa oso frontoi berezia da", adierazi du arrasatearren  entrenatzaile eta senior mailako pilotari Ibai Bolinagak.

Astigarragakoa pilotaleku txikia da, kalekoa, eta lurra berezia duena: "Gu ohituago gaude  Uarkapekoa moduko frontoi handietan jokatzera", dio Bolinagak.  

Lehen kanporaketarekin pozik 

Andoaingo taldearen aurkako kanporaketarekin pozik daude pilotari arrasatearrak. Kadeteetako eta gazte mailako partidu guztiak irabazi zituzten eta senior mailako biak, ordea, galdu (4-2):  "Oso ondo ikusi nituen kadeteak eta gazte mailako pilotariak; senior mailan apur bat eskasago ibili ginen Aritz [Zuatzua] eta biok, baina badago hobetzeko aukera". 

Sei pilotari, gogotsu eta ilusioz

Sei pilotari dira, gogotsu eta ilusioz beteta. Kadeteetan, aurrelaria da Ander Murua da eta atzelaria Ander Llodio. Gazte mailan, aurrelari lanetan Joseba Garate dabil eta atzelaria da Josu Egia eta, amaitzeko, senior mailan Aritz Zuatzua da aurrelaria eta Ibai Bolinaga bera atzelaria. 

Pilotari arrasatearrek badakite egubakoitzean jokatuko den joaneko kanporaketan aurkari zaila izango dutela aurrean, baina horrek ez die irabazteko goserik kendu. Ilusio handia dute, eta presio gutxi: "Lehen kanporaketa gainditu dugu eta Astigarraga moduko aurkari baten aurrean ez dugu ezer izango galtzeko. Gozatzera irtengo gara eta noski, irabaztera ere bai, baina ez dugu presio handirik". Bueltako kanporaketa hurrengo aste bukaeran jokatuko dute, Astigarragan. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.