"Arriaran eta Soroa atzelariak ziren eta ongi ezagutzen zioten elkarri. Biak adin berekoak genituen baina arrasatearraren eskarmentua handiagoa zen pilota munduan. Hala ere, zaletuak ez zetozen bat bi pilotariak aztertzeko orduan eta zein zen faboritoa ez zegoen garbi", kontatzen du Velez de Mendizabalek.
Eta egoera berean zeuden adituak eta medioak, "ez ziren ausartzen irabazlearen izena asmatzera", dio Debagoieneko historiagileak.
Giroa bero-bero
Eguna iristean, domeka, Bergarako frontoia bete egin zen, giroa pil-pilean zegoen, eta Velez de Mendizabalek kontatzen du Radio San Sebastianek zuzenean erretransmititu zuela norgehiagoka; eta besteak beste, La Voz de España eta El Diario Vasco egunkarietan kronikak izan zituela ere bai.
Eta lehia estu horretan, garaipena, azkenean, mondragoetarraren esku geratu zen. Nola erreakzionatu zuen Arrasateko herriak? Hori hurrengo ekarpenean ikusiko dugu, bukatzen du kontakizuna historiagileak.
Hurrengo kapitulura arte itxaron behar, bada. Bien bitartean, egun haren gaineko kontakizun osoa irakurtzeko Hots Begi Danbolinak blogera jo daiteke.