Hori horrela, ibilbidea honako hauxe izango da: Musakola-Anporreta-Musakola-Zazpi bide-Zubillaga-Bedoña-San Josepe-Kurtzexiki-Bakue-Zazpi bide-Musakola. Ibilbide horrek 34 kilometro ditu eta 1.200 metroko desnibela.
Baina, badago besterik. Zailtasun handiagokoa. 45 kilometrokoa. "Ibilbide luzea oso teknikoa da. Desnibel handia duena. Ia 1.700 metro. Maila handiko txirrindulariendako aproposa", dio Zeziagak.
Dagoeneko zabaldu dute izena emateko epea: aldez aurretik, www.musakola.com atarian edo egunean bertan, lasterketa hasi aurretik Ziar-Ola elkartean.
Ibilaldiaren erdi inguruan eta amaieran anoa postuak ipiniko dituzte, eta guztira, 250 txirrindulari onartuko dituzte.
Umeendako bizikleta jaia
Bestalde, egun berean, 10:30ean, umeendako bizikleta jaia egingo dute. Gazteendako ere bi ibilbide zehaztu dituzte. Biak ere, bidegorritik. Ibilbide erraza, Musakola-Ekilore-Musakola izango da; eta ibilbide zaila, Musakola-Elorregi-Musakola.
Umeek duten mailaren arabera, akaso pertsona heldu baten laguntza behar izango dute lasterketan parte hartzeko.