Laburra bezain oparoa izan da Gosariak lanaren aurkezpen bira. Joseba Sarrionandia, Iñigo Arregi eta Juan Luis Goikolea artista plastikoak eta Gose hirukotea batu dituen lan kolaboratiboa urrian Bilboko Guggenheim museoan aurkeztu zuten eta ordutik makina bat kontzertu eman dituzte Euskal Herri osoan.
Etapa berezi hau maiatzaren 30ean bukatuko du Arrasateko taldeak Tolosako Bonberenean. Aurretik, baina, azken geldialdia egingo dute etxean; Arrasateko gaztetxean joko dute. 24. urteurreneko ospakizunen barruan joko du Gosek, apirilaren 25ean (22:00) eta sarrerak jada eros daitezke Ttukun dendan eta Jai Zale tabernan (5 euro).
