Los Galerna Mexikon da egunotan

Argazkia: Gaztelupeko Hotsak.

Surf musika lantzen duen Arrasateko Los Galerna taldea Mexikon dabil egunotan. Atzo, martitzena, hasita, sei kontzertu eskainiko ditu: erdiak, bertako DF hiriburuan; eta beste hainbat, handik kanpo (Leon, Irapuato eta La Puebla). Handik bueltan, The Cavernarios talde mexikarrarekin partekatutako EP biniloa kaleratutako du: Sangre en el Atlantico. Los Galerna taldea egon da lehen ere Mexikon, biran.

2008an Euskal Herriko rock instrumentalaren ur geldoak aztoratzen hasi aurretik, beste hainbat proiektutan ibiliak dira arrasatearrak, guztiak rock-and-rolleroak eta indartsuak: The 5 Twisters, Foxy Boxxi, Lost Souls eta beste.

Rock-and-roll izerditsua egiten aritu ostean, Arrasateko laukoteak Los Galerna sortu eta, erronka moduan, rock instrumentala hartu zuen jomugan. Lehenengo diskoarekin The Ventures, The Shadows eta surf-rockaren beste hainbat klasikoren tamainako piezak plazaratu zituzten eta oinarrizko proba gainditu. Surfusion diskoa egiteko, berriz, saxoarekin boskote bihurtu eta garapen zein irudimenez jositako kantuak idatzi zituzten, latino eta funkytik, surf-rock klasikotik, psikodeliatik eta garagetik barra-barra edaten dutenak.

Punk eta rock-and-roll bizienaren astindua

Taldeak ez du hurbilean lehiakiderik eta, edozein agertokitan direla, kanpoan jotzen dutenean ere, maila oso goian uzten dute, mexikarrek egiaztatu ahal izan duten moduan. Hain zuzen ere, taldeak, ikuskizuna ematearekin batera, punk eta rock-and-roll bizienaren astindua ematen die ahotsik gabeko kantu are eta irekienei. 2013ko irailean Akelarre izeneko hirugarren lana kaleratu zuen.

Mexikoko kontzertuen kartela:

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.