Osasungintza euskalduntzeko hainbat kexa eta iradokizun jaso zituzten atzo Jai Zale tabernan

Jokin Bereziartua Lizarazu 2015ko mar. 14a, 10:36
Aitor Montes eta Garazi Sagasta atzo Arrasateko Jai Zale tabernan.

Euskarazko osasungintza baten aldeko ekintza berezia egin zuten atzo Aitor Montes medikuak eta Garazi Sagasta erizainak Jai Zale tabernan. Arrasateko Euskal Herrian Euskaraz taldeak kudeatzen duen tabernan, herritarrek osasun arreta euskaraz jasotzeko kexa eta iradokizunak batu zituzten, ondoren Osakidetzara helarazteko: "Uste baino askoz jende gehiago etorri zen, gaindituta ibili ginen", dio Montesek. Era berean, Korrika Kulturalaren barruan bertso saioa izan zuten Xabi Igoa, Ane Zuazubiskar, Maddi Sarasua eta Martin Berrizbeitiaren eskutik. 

Aitor Montes medikua "oso gustura" dago atzoko ekintzak izan zuen harrerarekin: "Datu bat emateko, 2013an Elebiden osasun arloan hizkuntza urraketengatik 20 kexa jaso ziren urte osoan. Atzo 78 kexa eta iradokizun batu genituen, arratsalde baten kopurua laukoiztu da. Atera kontuak", dio.

Horrekin Montesek adierazi gura du herritarrek ez dutela osasungintzan hizkuntza eskubideak urratuak izan zaizkiela sentitu izan, gaztelaniaz ohitu direlako. Bada, halako ekintzekin ohitura hori aldatuko dela espero du Montesek: "Hau oso bizkor doa. Atzo bi ordenagailurekin bakarrik ezin izan genuen gura beste kexa zein iradokizun jaso. Adibidez, Arizmendi ikastolakoak ere etorri ziren eta gurasoen artean ekimenaren berri emango dutela esan zuten". 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak