Martxan dira Arrasateko Udala Behekoa auzoa berriro urbanizatzeko lanak

Udala Behekoan hainbat lan egingo dira.

Otsail amaieran hasi ziren Udala Behekoa auzoa berriro urbanizatzeko lanak. 2012an hasi ziren lehen faseko lanak; auzoko baserrien atzealdean bide bat egin zen, hormigoizkoa: "Auzotarren beharrei erantzuteko egin zen bide hori, eurek zituzten partzelatara joan ahal izateko, hain justu", dio Udalak. Aurten egingo dira gainontzeko bi faseak, eta bi fase horietan hainbat obra egitea aurreikusten dute. 

Saneamenduari dagokionez, ur zikinak lur azpian jasota badaude ere, "baldintza egokietan" iraun dezaten berritu egingo dira. Era berean, auzotarrek menditik datorren ura erabiltzen badute ere, Udal sareko ura erabiltzeko aukera emango zaie eta gasari dagokionez, auzoan dagoen propano deposituari –Ingurumen Eskola hornitzen duena– beste bat gehituko diote Udala Beheko eraikin guztiak hornitzeko. Argindarra ere egungo beharretara egokituko da sarea lurpean jarrita eta argiteria publikoa ere jarriko da, orain arte ez da-eta egon. 15 farola jarriko dituzte, energia fotovoltaikoz hornituko direnak. Gainera, egun dagoen telefono sarea lurperatu egingo da eta baserrietara joateko dagoen hormigoizko bidea zabaldu eta asfaltatu egingo dute. Amaitzeko, elizaren eta Garaikotxiki baserriaren artean plaza berri bat egingo dute. 

Bi aurrekontutan jasota

Lan horiek urtarrilaren 19an esleitu zitzaizkion Construcciones Otegi-Gaztañaga enpresak eta 395.604 euroko aurrekontua du. Landa gunean kokatuta dagoen auzoa berriro urbanizatzeko proiektuaren inbertsioa bi aurrekontutan banatu da. Lehen fasea 2012ko aurrekontuan sartu zen eta bigarren zein hirugarren faseko lanak, berriz, aurtengo aurrekontuetan jaso dira. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.