Lagun Onak izango dute aurkari datorren jardunaldian, eta, azpeitiarrak jaitsiera postuetan dauden arren, domekako partidua ez dela erraza izango onartu du Zubiak. "Denboraldia aurrera doa, eta, talde gaztea izan arren, ez dira jaitsiera arriskuan egoteko bezain txarrak; beraz, gogor estutuko gaituzte", esan du.
Hortaz, sailkapena alde batera utzi, eta askorik erlaxatu gabe irten beharko dute arrasatearrek zelaira; bestela, partidua "tranpa" bihur litekeela azaldu du Zubiak. Gaineratu du aurrean jarraitzeko irabazi egin behar dutela, eta badituztela horretarako aukerak. "Partidu guztiak desberdinak dira, baina azkenaldian etxean indartsu gabiltza, eta motibatuta ikusten dut taldea", dio.
