Fagor Etxetresnetako kaltetuendako bitartekaritza lanak egingo ditu Arrasateko Udalak Mondragonekin

Fagor Etxetresnen itxieragatik kaltetutako Ordaindu eta Eskuratu plataformako kideak Arrasateko osoko bilkuran izan ziren atzo, Udalari eskatzeko Mondragon Taldearekin bitartekaritza lanak egin ditzala. Aho batez onartu zuen udalbatzak kaltetuek aurkeztutako mozioa eta konprometitu zen "bere esku dauden baliabide guztiak" jartzera elkarrizketa abiatu dadin. Osoko bilkuraren hasieran minutu bateko isilunea egin zuen udalbatzak, hil berri den PSE-EEko zinegotzi Rakel Diazen oroimenez. Gregorio Atxutegik ordezkatuko du Diaz aurrerantzean.

Fagor Etxetresnen itxierak kaltetutako pertsonez lepo bete zen atzo osoko bilkuren aretoa. Ordaindu plataformako eledun Mikel Olabe "pozik" agertu zen udalbatzak kaltetuek aurkeztutako mozioa aho batez onartu zelako: "Pozik gaude, baina askotan gauzak ez dira diruditen moduan. Hau da, hilabete askotako lanaren ostean lortu dugu udal talde guztien babesa. Mozioak bi helburu nagusi ditu: lanpostua galdu duten pertsona guztiak lanposturen baten birkokatuak izatea eta gure aurrezkiak bueltatzea. Uste dugu bi helburu horiek beteko ditugula; hori bai, gero eta beranduago izan, orduan eta okerrago izango da guretako eta kooperatibarendako". Mozioa defendatzerako orduan balio kooperatiboak eta kooperatiba eredua birpentsatu behar dela aldarrikatu zuen Olabek, besteak beste. 

Protesta bihar Garagartzan

Era berean, Olabek jakinarazi zuen euren egoera salatzeko beste ekintza batzuk antolatuko dituztela. Lehena bihar, eguena, izango da: Garagartzako lantegiaren atarian elkarretaratzea egingo dute, Catako presidente Xabier Bengoetxeari euren eskaerak helarazteko. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.