Isaias Carrascoren hilketaren gaineko epaiketa berriz egingo dute

Beñat Aginagalde, atxiloketaren unean.

Arrasateko zinegotzi sozialista ohia hiltzea akusatuta atzera ere epaituko dute Beñat Aginalgalde. Iazko maiatzean eginiko epaiketan absolbitu egin zuten, ez baitzen froga bezala onartu lekuko batek argazki bidez eginiko identifikazioa. Carrascoren familiak dio froga horrekin egiaztatzen dela egiletza eta Espainiako Auzitegi Gorenak orain dio ezin dela benetan baliozkoa den frogarik baztertu. 

Aginagalderen absoluzio epaiaren ondorioz, Espainiako Auzitegi Gorenaren aurrean helegitea aurkeztu zuten Isaias Carrascoren senideek, argudiatuz epaiketan lekukoetako batek egindako argazki bidezko identifikazioa froga gisa onartu izan balitz, Beñat Aginagalde errudun deklaratuko zuketela. Argudioa onartu eta Gorenak epaiketa errepika dezala eskatu dio Auzitegi Nazionalari.

Argazki identifikazioa auzitan

Hala, Gorenak dio – Candido Conde Pumpido magistratua txostengile dela – "gertaeren larritasuna" aintzat hartuta, ezin bazter daitekeela "benetan baliozkoa den egozketa-frogarik". Aipatutako argazki-identifikazioa da froga hori, lekukoetako batek, hilketa gertatu eta urtebetera egin zuena. Hark azaldutakoaren arabera, Navas de Tolosa kalean gurutzatu zen epaituarekin, ostean "petardo hotsak eta Carrascoren alabaren oihuak" entzun zituela eta berehala aurreko espaloian lehenago ikusitako mutila korrika ikusi zuela. Beste lekuko batek  susmagarriaren deskribapen berdina egin zuen baina bigarren horrek ez zuen argazkitan identifikatu.

Epaiketan froga nahikorik ez zegoela-eta, ez zen errekonozimendua onartu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.