Sailkapenean gora egiteko, gogor borrokatu beharko du Mondrak

Mutrikuarren aurka 2-1 galdu ostean, jardunaldi honetako norgehiagokan irabaztea ere ez du erraza izango Mondrak, Josu Zubia entrenatzaileak onartu duenez. Izan ere, tolosarrek, sailkapenean beherago egon arren, "talde polita" dute, "joko konbinatuan ona", eta, Zubiaren esanetan, baloia mugitzen dakiena. Ligako lehen jardunaldian ere izan ziren bi taldeak aurrez aurre, eta orduan tolosarrek irabazi zuten.

Astean zehar, ordea, entrenamenduetan "lan ona" egin dute arrasatearrek; beraz, ikusteko dago oraindik partiduan zer gertatzen den. Zapatuan 17:30ean izango da hori, Tolosako Usabal kiroldegian.

Zubiak uste du Mutrikun gertatutakoa urduritasunaren ondorio izan zela, jokalariek jarrera ona erakutsi zuten-eta jokoan. Horregatik, konfiantza eman nahi die zapatura begira: "Ausartak izateko esaten diet".

Igoerarekin itsutu gabe

"Urruti gaude igoeratik", dio Zubiak, eta ez du ahazten helburua hori dela, baina, bide horretan, lehenengo beste pauso batzuk eman behar direla dio. "Lehenengo, gauzak ondo egin behar ditugu, eta horrela hurbilduko gara goiko postuetara", esan du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.