Herritar talde batek antolatuko du aurten ere Arrasateko Errege Magoen kabalgata eta 140 lagunetik gora izango dira parte-hartzaileak: erromatar guardiak, zuzilariak, ezkutariak, haurren abesbatza, karroza, jaiotza biziduna... ezer ez da faltako hortaz; ezta ere, zaldi gainean joango diren hiru Errege Magoak.
Kabalgata 17:30ean hasiko da eta lehen geldialdia Iturbide egoitzan egingo dute. Opariak banatuko dizkiete bertan erretiratuei eta handik zuzenean joango dira ibilbidearen abiapuntu ohikora. Desfilea, zuzilariekin, Zerkaostetarantz joango da eta 19:00 irtengo dira ibilbide osoa egiteko: Zerkaosteta, Iturbide, Garibai etorbidea, Maalako biribilgunea, Maalako errebala, Portaloia, Erdiko kale eta, azkenik, Herriko Plaza.
Plazan 19:30ean ekitaldia hasiko da haurren abesbatzaren kantuekin eta jaiotza biziduna antzeztuz. Ostean Errege Magoen gurtza etorriko da eta irakurraldia egingo dute txikienek. Bukatzeko Errege Magoen Debagoieneko Ospitalera joango dira han ere opariak banatzeko.
