Hilaren 22a eta 27aren artean jokatu da 14. Arrasate Hiria xake txapelketa, xake elkartearen San Andres auzoko egoitzan. Aspaldiko ezaguna den Alejandro Franco Nazioarteko Maisu madrildarrak eskuratu du txapela aurten, aurten aurkari nagusi eta faborito moduan zetorren Orelvis Perez Maisu Handi kubatarrak, motibo pertsonalak medio, ez baita aurkeztu.
Arrasateko Xake Elkartetik azaldu dutenez, printzipioz Francorentzat aise irabazteko modukoa zena, azkenean borrokatu behar izan zuen madrildarrak, gazteenek erakutsitako mailarengatik. Cyrus Low, 12 urteko mutiko singapurtarrak, lehia estua aurkeztu zion espainiarrari, lehengo errondan bertan berdinketa lortuta. Azkenean Low bigarren geratu zen eta Asier Etxagibel arrasatearra, hirugarren.
