Ia 40 sari eta 100 zinemalditan lehiatu ostean ekarri du Manu Gomezek Dan Kind Arrasatera. Zuzendaria pozik zegoen, "zinemagilea banaiz, pareta hauetan ikusitakoagatik da", esan zuen. Labur hau, ikasleei proposatutako praktika batetik hasi bazen ere, une gozo ugari eman dizkio.
Guztiaren hasiera
18 minututan argi ilunez jositako istorio bat kontatzen du Gomez zuzendariak. XIX. mendea, Austria, gizon bat bere semea noiz jaioko den itxaroten dago. Une alai bat den arren, familiak ez daki jaiotza horrek gizateriari zein hondamendi sortuko dion. Poztasuna eta krudelkeria, alaitasuna eta beldurra . . . guztia nahasten da film honetan. Zuzendariak azaldu moduan, gertakari guztiek hasiera bat dute.
Filmean, Dreyer edo Hanekeren arrastoa erraz ikusten da, "gidoia idaztean ez duzu erreferentziarik izaten, baina proiektuak aurrera egin ahala, ezinezkoa da, miresten dituzun zinemagileen lanak erreferentzia bezala ez erabiltzea", dio zuzendariak.
