Gabonetarako 100 otzara banatuko ditu Ibai-Artek abenduaren 20an

Abenduaren 20an banatuko dira saskiak Herriko plazan; Ibai-Arte txartela erabili izana sarituko dute merkatariek.

Aurten bosgarren urtez, Ibai-Arte merkataritza elkarteak Gabonetako 100 otzara zozketatuko ditu Ibai-Arte txartela erabiliz elkarteko kide diren komertzioetan erosketak egiten dituztenen artean. Zozketa bidez banatzen dira otzarak eta Ibai-Arteko bezeroen fideltasuna saritzea da ekimenaren helburu nagusia. Saskiak abenduaren 20an banatuko dira Herriko plazan (13:30). 

Saskiok askotariko produktuez osatuta daude: bi cava botila, lau ardo botila, gazta, txorizoa, saltxitxoia, pikillo piperrak, zainzuriak, ananak, turroiak eta bonboiak, besteak beste. 

Ibai-Arteko zuzendaritza taldeko kideen arabera, "sekulako harrera" izaten du saskien ekimenak: "Oso pozik gaude herritarrek egiten dugun lana baloratzen dutelako. Aurtengoa bosgarren urtea da eta dagoeneko oso errotuta dago bezeroen artean. Gabonetako saskien ekimena geratzeko etorri da". 

Loteria-txartelak doan

Saskien zozketa ez da, baina, Ibai-Artek Gabonetara begira antolatu duen ekintza bakarra. Elkarteko kide diren edozein saltokitan erosketa egiteagatik Errege eguneko loteria-txartelak oparituko dituzte; 72.608 zenbakia duten txartelak, hain justu. 

Horrez gain, joan den zapatuan haur eta gaztetxoendako egin ziren animazio ekintzak errepikatuko dituzte hilaren 20an; tirolina, pendulua, puzgarriak, joko ludikoak, super-jumping-a, mahai-futbol erraldoia... Zabala izango da eskaintza; Biteri plazan, 11:30etik 13:30era eta 16:00etatik 19:00etara. Helburu argia du ekimenak: "Adin guztietako haur eta gazteek Gabon garaiko egun hauetan Arrasaten gozatzea gura dugu", diote Ibai-Artekoek. 

Bezeroekin batera, cava kopa

Era berean, nobedade moduan,  urtea cavarekin topa eginez bukatuko du Ibai-Artek: "Abenduaren 31n cava kopa batez gozatu ahal izango dute bezeroek 12:00etatik aurrera, Ibai-Arteko kide diren saltokietan". 

Bestalde, udalerria girotu eta Gabon giroa emateko kaleak argiztatu dituzte Gabonetako argidun bola eta errezelekin saltoki, fatxada eta balkoiak apainduz. Horrez gain, Ibai-Arteko loreontziak ere pazko loreekin apaindu dira. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.