Keu Agirretxearen eta Xabier Iriondoren KX, musika-bidaia, domekan, Amaia Antzokian

Keu Agirretxea eta Xabier Iriondo eskarmentu handiko musikarien proiektu musikala da KX; Ondarroan eta Milanen sortutako bidaia musikala da. Adituen esanetan, abestiei eta esperimentazioari hegoak emanda, bat egiten dute melodiak eta avant-garde soinu gordinenek. Labetik atera berria da; Arrasate Mauka musikagintza ekoiztetxearekin argitaratu dute. Amaia Antzokiko hallean erakutsiko dute, domekan, 20:00etan.

Abenduaren 4an erakutsi zuten estreinakoz jendaurrean, Gernikan. Harrezkero, Ondarroan, Durangon, Iruñean, Urretxun, Azpeitian eta Gasteizen izan dira. Asteburuan ere beste hiru emanaldi egingo dituzte: Arrasatekoaz gainera, Baionan eta Markinan. Hain justu, Arrasatekoa izango da aurten elkarrekin egingo duten azkeneko zuzenekoa, bi asteotako bira maratonianoaren ondoren musikari bakoitzak bere ohiko lan-jarduerei helduko die-eta. Arrasateko kontzerturako sarrerak zazpi eurotan salduko dituzte: leihatilan eta on line ere bai.

Parkean ezagutu zuten elkar

Ondarroakoa da Keu Agirretxea, eta aita ondarrutarra zuen italiarra da Xabier Iriondo. "Ez nuen ezagutzen, baina aspaldi nuen haren berri, urtero etorri izan da-eta, besteak beste, udako oporretan, egun Afterhours talde famatuko kidea den Ondarroako italiarra. Duela hiru urte ezagutu genuen elkar, nor bere  haurrarekin, jolasparkean geundela. Nire musika-lan batzuk erakutsiko nizkion, hark ere nire erreferentzia musikalak izateko. Urrian hasi ginen, posta elektronikoz bidalitako mezuen bitartez, musika-ideiak eta grabazioak partekatzen. Handik bi urtera konturatu ginen diskoa osatu genuela. Aspalditik lankide ditudan Maukako lagunei erakutsi ondoren, argitaratzea erabaki genuen", esan du Keu Agirretxeak.

Ondarroako lantalde indartsua batu zitzaien proiektura: Josu Eizagirre bideogilea eta Yolanda Eizagirre argazkilaria, besteak beste. Aipatutakoez gainera, luxuzko kolaboratzaileak ere izan dituzte; besteak beste, hainbat kanturen hitzak egin dituzten Kirmen Uribe eta Mikel Etxaburua.

Oso lan 'ondarrutarra'

Diskoaren azalean agertzen den buruhandien irudiaz gainera, proiektu horretan hainbat dira Ondarroari egindako keinuak; adibidez, kantuetan aipatutako herriko kontuak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.