Ford Mugarri Arrasatek ezustea eman zuen atzo, eta ligan lider dagoen Eibar Euskal Kopatik kanporatu zuten, 30-29 irabazita. Hala, zapatuan Musakolan Pulpori irabazi ostean Pablo Gartziak aitortu zuen asteleheneko kontrarioa gogorra zela, gutxik uste zuten Arrasatekoak kopan aurrera egiteko gauza izango zirela, baina bai, final-laurdenetarako txartela eskuratu zuten, eta urtarril hasieran jokatuko dute Bidasoaren kontra.
Atzoko partiduak zapatukoaren antz handia izan zuen, markagailuko gorabeherei dagokionez bai, behintzat. Bazirudien lehenengo zati amaieran Eibarrek gainditu ezineko aldea hartu behar zuela (16-21), eta bigarren zatiaren hasiera ere ildo beretik joan zen. Ford Mugarri Arrasatek, baina, Pulporen kontra moduan, harripetik atera zituen indarrak, partidua berdintzeko lehenengo, eta gol bateko aldeagatik irabazteko gero (30-29). Hala, final-laurdenetan Bidasoa izango dute aurrean arrasatearrek. Urte hasieran jokatuko dute lehia hori, baina eguna zehazteke dago oraindik.
