Esan bezala, Badoa, badirau diskoaren aurkezpen kontzertua izan zen atzokoa, beraz, esan daiteke lan berriko kantuak nabarmendu zirela. Hala ere, aurreko lanei keinu eginaz, euren abesti mitikoenak ere interpretatu zituzten, publikoak gehiago disfruta zezan.
Ez zen ordea izan, abesti soilez osatutako emanaldia; poesia, dantza, ikus-entzunezkoak eta espektakulua uztartzen zituen ikuskizuna izan zen. Esaterako, kontzertua Sarrionandiaren berba batzuekin hasi zuten, euren "gero arte" diskoaren esanahia azaltzeko.
Bestetik, erronka berriak gainditu dituztela erakutsi dute Ain_1ekoek: euskalkian abestera edota melodium-a bezalako instrumentu "arraroekin" jotzera ausartu ziren.
Lagunarteko giroa
Eszenatokia erosoa izaten esfortzu handia egin zutela ikusi zen; aulkiek, kandelek eta argiek asko lagundu zuten ikuslegoa "etxean bezala" sentiarazteko: oso giro intimo eta epela usaintzen zen. Publikoak ere asko lagundu zuen aurkezpen kontzertua berezia izaten: bistakoa zen, lagun, ezagun eta familiarteko asko gerturatu zirela kontzertura, eurekin izandako konplizitatea nabarmentzen zelako. Horretaz gainera, kantu eta kantu artean, euren edo instrumentuei buruzko anekdotak kontatzeko edota txantxa batzuk egiteko denboratxoa hartzen zuten taula gainekoek. Publikoa berenganatzen joan ziren apurka-apurka.
Saioa borobiltzeko, esan daiteke nahiko ikuskizun osatua eta ikusteko polita izan zela. Hitz gutxitan esanda, lasai ikusi eta musikaz disfrutatzen den emanaldi horietakoa izan zen.
"Gero arte" bat izan da
Esan bezala, lan honekin taldeak bere jarraitzaileak agurtzen ditu. "Helburua zen lan berria erakustea, baina, lan berrian bagoazela esaten ari garenez, nolabaiteko agur bat ere bada" azaldu dute Ain_1ekoek atzoko kontzertuaz.
Ahotsenean ere izango dira
Hori horrela, taldeak, lozorrora joan aurretik, belarri gehiago goxatuko ditu hemendik eta otsaila bitartean eskainiko dituen kontzertuetan.
Hurrengoko emankizuna eguaztenean izango da, Berrizen. Durangoko Azokako Ahotsenean ere izango dira asteon, egubakoitzean. Horretaz gainera, euren diskoa ere bertan egongo da Musikazuzenean-en.