John Anduezak helduentzako lehen nobela atera du, 'Prime-time'
Jon Berezibar
2014ko aza. 27a, 16:15
Bilboko ikertzaile agentzia baten girotu du John Anduezak Prime-time. Gazteentzako hiru liburu atera eta gero, helduentzako lehen lana da aurkeztu berri duen nobela beltza. Joël Dicker egile suitzarraren La verité sur l'affaire Harry Quebert (Harry Quebert kasuari buruzko egia) eleberriak inspiratuta heldu ei zion erronkari, bere buruari desafio eginez.
Liburuarekin "oso pozik" eta nobela "potentea" dela kontatu berri du aurkezpenean Arrasateko idazleak. La verité sur l'affaire Harry Quebert irakurri ostean txunditu eta dema egin zion bere buruari, ea euskaraz halakorik egiteko gauza ba ote zen. Prime-time izan da emaitza, Ertzaintzatik kaleratutako bi gizonezko dituenak protagonista, Bala eta Clemente, ikertzaile agentzia baten dihardutenak. Telebistaren munduan girotu du Anduezak nobela eta, hain zuzen, eskarmentua duen gidoigintzako eta kazetaritzako idazkera garbi eta azkarra erabili ditu plano diferentetan eraikitako istorioa kontatzeko.