Batez ere liburuak trukatu dituzte Arrasateko truke azokan

Erakusmahaia liburuz beteta, elkar truke azokan.

Atzo, egubakoitza elkar truke azoka egin zuten Arrasateko Azoka Plazan. Musika eta literatura izan ziren trukeko protagonista, eta hori horrela, azokan parte hartu zuten herritarrek, liburu, CD eta biniloak eraman zituzten aldatzeko, besteak beste.

Hala ere, "bereziki liburuak" trukatu zirela azaldu du Onintze Guridi Bagarako kideak. Elkar truke azoka normalean zapatuan egiten duten arren, azkenekoa egubakoitzean egin dute, esan bezala: "Zapatuan erreka garbitzera joateko deialdia zegoenez, egubakoitzera aurreratzea erabaki genuen", azaldu du Guridik. Beste batzuetan baino jende gutxiago hurbildu dela ere esan du; "igual eguna aldatzeagatik, eta eguraldi oso ona ere egin zuenez, bada, jendeak halakoetan beste plan batzuk egiten ditu", azaldu du.

Hurrengoa azaroaren 15ean

Hurrengo elkar truke azoka azaroaren 15ean, zapatua, egingo dute, ohi bezala, Azoka Plazan, 10:00etatik 13:00etara.

Guridik aurreratu duenez, egun horretan Txatxilipurdik abenduan egiten duen truke azokarako jostailu batzearekin bat egingo dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.