Arrasate Pilota Taldea: "Umeei gonbidatu gura diegu probatzera, konpromiso barik"

Jokin Bereziartua Lizarazu 2014ko urr. 17a, 11:00
Ume bat pilotari ematen, iazko sanjuanetako txapelketaren barruan.

Aste bukaera honetan ere pilota izango da protagonista Uarkapen. Hainbat partidu eta askotariko mailatakoak jokatuko dira gaur eta bihar. Gaurko lehiak 19:00etan hasiko dira eta 22:00ak aldera arte ez da etenik izango. Bihar, 16:00etatik aurrera, alebin eta infantil mailako errendimendu partiduak jokatuko dira. 

Arrasate Pilota Taldea harrobia lantzen ari da, haur eta gaztetxoekin lanean. Ibai Bolinaga pilotari arrasatearra dabil, beste pilotari edo pilotari ohi batzuekin batera, lan hori egiten. 

Pilotariak edo pilotari ohiak begirale lanetan

Umeekin lan egiteko jende oso aproposa dabil, Bolinagaren arabera: "Taldeko begirale guztiak pilotariak edo pilotari izandakoak dira eta badakite hasiberriei pixkana pilotan jokatzen nola erakutsi. Gainera, entrenamenduetan giro oso ona egoten da eta pilotan ikasteaz gain, umeek oso ondo pasatzen dute". Martitzen eta eguenetan entrenatzen dute, 16:40etik 18:30era: "Astero bi entrenamendu egiten dituzte eta egubakoitzetan eurendako lagunarteko partiduak antolatzen ditugu. Hala ere, laster lagunarteko partiduak alde batera utzi eta santamasetako txapelketarekin hasiko gara. Umeendako klubetik bi txapelketa antolatzen ditugu urtean, santamasetakoa eta sanjuanetakoa, eta partidu guztiak egubakoitzetan jokatzen dira". 

Oraindik, baina, badago parte hartzeko aukera: "Pilotan interesa duten ume guztiei kirol hau probatzera animatzen diegu. Frontoira etorri eta entrenamenduetan parte hartu dezakete inongo konpromiso barik. Probatu ostean, erabaki dezakete elkartean sartu ala ez". Izena emateko Uarkapera hurbildu eta begiraleekin harremanetan jarri behar da. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak