"Iruzurgile" bat dabil autoa kolpatu diotelakoan 800 euro eskatzen, Udaletik jakinarazi dutenez

Iruzur baten berri eman dute Arrasateko Udaletik, herritarrak jakinaren gainean egon daitezen. Jaso duten salaketa baten harira, "iruzurgilea" autoa kolpatu diola esanez gerturatzen zaio subjektuari, telefonoz haren aseguru-etxearen itxurazko ordezkari batekin jartzen du harremanetan eta hark eskudirutan 800 euro emateko eskatzen dio hari, gero aseguru-etxeen artean konponduko direla agindu eta dirua itzuliko diotelakoan.

Udalak ohar bidez zabaldutako azalpenen arabera, atzo gertatu zen "iruzurra".  Salaketa egin duen herritar horren arabera, pertsona bat gerturatu zitzaion atzo esanez "agian ez zela ohartuko momentuan baina bere kotxeari kolpe bat" eman ziola. Konponbide bat adosteko eskatu ei zion "iruzurgileak" eta, antza,  biktima aseguru-etxearekin jarri zuen telefonoz berbetan. Bitartekari faltsu horrek 800 euro eskudirutan emateko eskatu zion salatzaileari eta erreklamazioaren egilearekin batera, kutxazainera joan zen dirua atera eta eskura emateko. Itzuli behar omen zizkioten 800 euro horien beste berririk ez du izan salatzaileak, kontatutakoaren arabera.

Arrasateko Udaletik geratutakoaren berri eman eta halako egoera baten aurrean, udaltzainei jakinarazteko eskatzen diete herritarrei, inorekin kutxazain batera joan aurretik, dagoen lekura joango baitira agenteak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.