Udazkeneko eskaintzari hasiera emango zaio gaurko kontzertuarekin, eta abenduaren 31ra arte, ikuskizun eta emanaldi askotarikoak izango dira herritarren eskura. Gipuzkoako Foru Aldundiaren Gaztemaniak! egitarauaren barruan dago gaurkoa, eta Arrasateko udalaren laguntzarekin antolatu da.
Kanadatik, rock alternatiboa
Sam Roberts Band taldea Kanadako panorama alternatiboko erreferentzia interesgarrienetako bat da. Hala frogatzen dute euren herrialdeko hedabideek eta industria diskografikoak emandako sariek; euren diskoek izandako salmentek eta euren kontzertuen arrakastak. Horrela dio Karmelo Alberdi Arrasateko kultura teknikariak taldeaz galdetuta: "Ez da ohiko taldea. Seikotea da, musikari bikainak, sintetizadorea erabiltzen dute... Abestiek berez ere indar handia dute". Kanadarrek, lagun izango dute Amaia Antzokiko hall-ean, Oñatiko Malenkonia taldea. Izan ere, Gaztemaniak! proposamenaren helburua izaten da bertako taldeei ere kontzertuak emateko aukera eskura ipintzea.
Aurretik, Malenkonia
Malenkonia talde oñatiarrak izango du, beraz, kontzertuari hasiera emateko ardura. Homo homini lupus bigarren diskoarekin etorriko dira gaur Arrasatera. Giro goxoa sortuko da gaur bertaratzen diren ikusleen artean, izan ere, Amaia Antzokiko Hall-ak horretarako bidea ematen du. "Akustika aldetik ondo dago, arazo handiena da erdian dagoen zutabea. Dena den, uste dut rock kontzertuetarako aproposa dela. Giro polita sortuko da", dio Karmelo Alberdi teknikariak. Sarrerak salgai daude zazpi eurotan, kutxasarrerak.net webgunean edota, leihatilan bertan.
Arrasate Irratiak Malenkonia taldeko Iñigo Ugarte gitarra joleari egindako elkarrizketa duzue jarraian, entzungai.